hroðalega margt

sem ég þarf að muna á morgun (sunnudag sko, sem er fræðilega séð orðinn í dag)

Taka með mér Bölvun járnsins (og hinar nóturnar sem búálfarnir eru nú búnir að skila) til að passa nú vel í messu i fyrramálið (nei annars, þarf bara að kíkja betur á einn frasann fyrir tónleikana.

Taka með mér aukabjöllu á æfinguna klukkan eitt

Muna eftir posanum sem ég leigði í (gær)fyrradag

Tékka á statífum í fyrramálið – vona þau séu í Seltjarnarneskirkju ekki í Neskirkju þar sem næstu tónleikar SÁ verða

Tékka á hvað margir vilja koma og borða með okkur eftir tónleika, á æfingunni klukkan 1 á morgun.

Panta mat fyrir þá sem vilja.

Klára að plögga fyrir tónleikana klukkan 16:00 í Guðríðarkirkju, Grafarholti (merkingar útumallt þegar maður beygir inn í Grafarholt, nánast ekki séns að villast)

Er örugglega að gleyma einu eða tveimur atriðum, jámm.

Uppfært. Passar – eitt til tvö atriði

Muna kaffibaunir

Muna vídjóvél og statíf.

Uppfærsla #2

Kerti í Seltjarnarneskirkju (enn verið að selja)

Ætli þetta sé búið?

Ástardrykkurinn

jæja, þá er maður búinn að fara í óperuna, Donizetti stóð fyrir kvöldinu hjá okkur bóndanum.

Ekki var sýningin af verri endanum, Dísella, Garðar, Ágúst, Bjarni Thor og svo auðvitað Hallveig mín stóðu sig brilljant og það þrátt fyrir að við værum í arfavondum sætum, alveg innst undir svölunum. Kórinn var líka fínn, ekki get ég sagt að ég hafi tekið eftir því að þau dönsuðu og léku eitthvað illa, söngurinn var samt bestur hjá þeim. Enda eru þau jú söngvarar öll með tölu.

Músíkin – já gagnrýnendur hafa verið að agnúast út í að hún sé nú ekki merkileg, en samt hafi þeim þótt gaman á sýningunni og hvetja fólk til að fara. Nei, það er svo sem ekki mikið sem kemur á óvart, hljómagangurinn er frekar fyrirsjáanlegur, laglínurnar sætar og fínar, þetta sannar bara það sem tónsmíðakennarinn minn hann Þorkell sagði einu sinni við okkur í tíma: Maður getur alveg sagt: Þessi músík var gríðarlega merkileg og vel samin og úthugsuð, djúp eins og hafið – en mér hundleiddist og mig langar aldrei til að heyra hana aftur. Á móti, stundum hugsar maður: Þetta var nú svosem ekki par merkilegt en mikið var þetta yndislegt og ég komst í svo gott skap, þetta gæti ég vel hugsað mér að heyra aftur sem allra fyrst.

Kærar þakkir fyrir okkur, já ég get sannarlega vel hugsað mér að koma aftur og sjá ykkur. Verst að ná ekki að sjá Gissur minn og Þóru í aðalhlutverkunum.

(myndinni stolið af vef Óperunnar án þess ég skammist mín – hlýtur að vera í lagi fyrir auglýsingu á sýningunni :þ)

aldrei hélt ég

að ég myndi banna barni sem þrábiður um að fá að fara á sinfóníutónleika að fara.

Stelpurnar fóru á Eldfuglinn á Heyrðu mig nú! tónleikum Sinfó. Finn langaði svoooooooo að fara með, en hann var þegar orðinn dauðþreyttur eftir daginn og langur og erfiður dagur hjá honum á morgun þannig að ég setti stólinn fyrir dyrnar.

Eldfuglinn verður vonandi fljótlega fluttur aftur…

já nefnilega

spurning um hvort þetta var svínið sjálft eftir allt saman? Þarf víst ekki að vera neinn hiti að ráði, talað um andþyngsli og verk í lungum, jahá. Passar allt saman. Fann greinina í svarhala hjá Ellu.

Kannski var ég heppin að vera búin að vera í púli í leikfimi í 2 mánuði fyrir veikindi, samkvæmt greininni hjálpar það helling.

Maður spyr sig.

Alveg góð, nei ekki enn en líður miklu miklu betur takk.

brjáluð helgi

framundan.

Fyrramál, æfing í Guðríðarkirkju frá tíu til tvö, þá rjúka niður í Suzukiskóla og sjá stráksa spila á tónleikum sem byrja klukkan tvö, þá beint upp í Kringlu, drengjakórinn er með köku- og allsherjarbasar þar, við eigum vaktina frá þrjú til sex eða þangað til allt er búið. Leyfi mér að vona að allt verði búið fyrir klukkan þrjú. Skutla stráksa til ömmu sinnar og koma mér heim, erum að fara á óperusýninguna um kvöldið.

Nema dagurinn verði svona: Æfing frá tíu til tvö – fá að fara fyrr og taka Söngvaseiðssýningu, mæting eitt, þá tekur Jón Lárus tónleika Finns (verður þar reyndar hvort sem er) og basarinn og skutlið til ömmu. Eiginlega auðveldari þannig, dagurinn.

Sunnudagur. Mæting klukkan níu um morguninn í Seltjarnarneskirkju, spiluð eitt stykki Haydnmessa í morgunmessu, heim, mæting í Guðríðarkirkju klukkan eitt, æfum Rauðan hring og kíkjum væntanlega eitthvað á Bölvunina líka. Tónleikar þar klukkan fjögur (muuuuna að mææææta aaaaalliiiir), búnir rúmlega fimm, þá verður væntanlega eitthvað gert eftir tónleika.

Verður bara þægilegt að mæta í vinnuna á mánudaginn…

úff

longtæm nó blogg! Ekki gott.

Klikkað að gera að undirbúa tónleikana og fleira – þarf líka að komast í pósthús og senda einn disk af Guðbrandsmessu til Bandaríkjanna, lofaði að senda það í dag en það er víst fullseint, skipti yfir á vetrardekk í dag og fór á bókasafnið, tókst að gleyma kortinu mínu þar auðvitað en fékk þrjár ljóðabækur sem lofa góðu.

Svo finnst mér þetta alveg klikkað flott.

bóndinn

fór með strákunum í kórnum í æfingabúðir yfir helgina, skemmti sér bara vel og þetta var ekki eins erfitt og hann hélt. Náði einum góðum brandara á föstudagskvöldið – hann neitar að blogga honum sjálfur þannig að ég má:

Þegar nokkrir foreldrar fara með svona strákahóp í ferð er svo sem nóg um að vera þannig að reynt er að hafa eldamennskuna frekar einfalda. Á föstudagskvöldinu voru sænskar kjötbollur sem er hægt að kaupa frosnar í pokum í IKEA. Jóni fannst þetta náttúrlega bráðsniðugt, verst hvað það væri samt mikið vesen að þurfa að skrúfa þær allar saman…

Bölvun járnsins

Plöggplögg, ekki missa af þessum, verða magnaðir tónleikar!

Bölvun járnsins og ákall til regnsins

Sunnudaginn 8. nóvember kl. 16:00 heldur Sönghópurinn Hljómeyki tónleika í Guðríðarkirkju, Grafarholti. Yfirskrift tónleikanna er Bölvun járnsins, en flutt verður á tónleikunum samnefnt verk eftir eistneska tónskáldið Veljo Tormis. Flytjendur í því verki ásamt Hljómeyki eru Þorbjörn Rúnarsson, tenór, Jóhann Smári Sævarsson, bassi og Frank Aarnink, slagverksleikari.
Annað stórt verk sem flutt verður er Cloudburst eftir bandaríska tónskáldið Eric Whitacre. Þeir Veljo Tormis (1930) og Eric Whitacre (1970) eru meðal merkustu kórtónskálda 20. og 21. aldar. Það má segja að í þessum tveimur verkum sæki þeir báðir efnivið sinn í þjóðtrúna. Texti Veljo Tormis er að hluta sóttur í Kalevala-ljóð Finna en texti Cloudburst er byggður á ljóði mexíkanska ljóðskáldsins Octavio Paz. Í verki Veljo Tormis er járninu bölvað og þeim drápsvélum sem hafa verið búnar til úr því en í Cloudburst er rigningin ákölluð og til að ná fram réttri stemmningu í verkinu er m.a. leikið á handbjöllur og slagverk. Slagverksleikarar í Cloudburst eru Frank Aarnink og Jóhann Friðriksson, ásamt kórfélögum.
Önnur verk sem flutt verða eru hluti af verkinu Madrigali: Six Firesongs eftir Morten Lauridsen, tveir söngvar úr Sept chansons eftir Francis Poulenc, Rauður hringur eftir Þuríði Jónsdóttur og Hvíld eftir Huga Guðmundsson. Stjórnandi Sönghópsins Hljómeykis er Magnús Ragnarsson.
Aðgangseyrir er kr. 2000.-

Chanson triste

hér spilar Freyja Chanson triste eftir Tjækovskí, gekk alveg ágætlega hjá henni. Voða montin mamma. Júlíana Rún spilaði með og gaf góðfúslegt leyfi til að setja þetta á netið.

trúði

ekki mínum eigin hálsi í gærkvöldi – fór að finna fyrir hálsbólgu. Nokkuð sem ég er ekki búin að vera með, þrátt fyrir hósta og svolitla raddbandabólgu. Sem er NB ekki farin enn, grrr. Mundi síðan seint og um síðir eftir tveimur ráðum – gurgla með pensími og taka íbúfen og fara að sofa. Bólgan er nánast farin, finn einn auman hálskirtil þegar ég ýti þar á en ekkert vont að kyngja eða neitt. Hjúkk. Veit ekki hvort virkaði eða bara hvorttveggja.

Er síðan að fara með yngri ungling, hún á að spila á tónleikum á eftir. Búin að æfa voða vel, ég vona það gangi eftir því.

stórskrítið

að vera ein í kotinu – Finnur í æfingabúðum og pabbi hans með honum sem hópstjóri, Freyja farin að passa fyndna barnið og Fífa í afmæli. Og ég sem nenni ómögulega að semja neitt, fæ mér frekar bara rauðvínsglas og hangi á netinu eða eitthvað. Já og ég á víst 2-3 bækur ólesnar.

Verður þetta ekki bara næs?

Jú kisa er reyndar heima…

flinkur

þessi:

hawhawhaw

mynduð þið kaupa námskeið í vefsíðugerð frá þessu fyrirtæki?

Nii, ekki ég heldur…

fyrir þá

sem nota Firefox og langar ekkert sérstaklega til að fá nýjustu uppfærslur um bakspikið á Beyoncé og appelsínuhúðina á Kristy, þá er viðbótin hér algjör snilld. Gætuð þurft að sækja lítið forrit til að virkja viðbótina en síðan ég virkjaði hjá mér get ég bara alveg farið inn á vísi punktur is án þess að verða óglatt. Mæli með þessu.

ekki orð

um rödd og lasleika. Ónei.

Jón Lárus fékkst með örlitlum erfiðismunum til að taka alla drengjakórshelgina, þetta er frá hálfsex á föstudegi til hádegis á sunnudag, hefði eiginlega tæpast tekið því að skipta helginni milli sín. Líka sparar bensín, þó það sé ekkert rosalega langt þarna í Hlíðardalsskóla þá er bensínið nú ekki beinlínis gefins núorðið.

Freyja spilar á tónleikum á laugardaginn, hlakka til að heyra, og Finnur eftir viku.

mjakast

þetta mjakast allt – sleppi væntanlega morgundeginum úr kennslunni líka, kenni svo ekki á fimmtudögum og föstudögum þannig að þá hef ég 4 daga til að ná mér almennilega.

Spurning samt að dobla bóndann til að taka helgina – stráksi að fara í æfingabúðir með drengjakórnum og við erum skráð með einn hóp. Líst ekki á að þurfa að garga yfir hóp.

(reyndar eru þetta pollrólegir strákar sem við verðum með í hóp, fjórir 9 ára guttar – en samt…)

Vá hvað ég má samt svo ekki við að fá svínaflensuna í beinu framhaldi. Allir puttar og tær krossuð!

hvað er

með að búa til nammi – ja reyndar hálstöflur – með sápubragði?

Bað Jón Lárus að kaupa Läkerol með lakkrísbragði, hann kemur heim með ágætis pakka, svartan, en það var sko ekki lakkrísbragð fyrir fimmeyring heldur nánast púra sápubragð. Jakk. Pakkanum hefur verið hent.

Og nei, ekki orðin góð, ég ætlaði að reyna að ná að kenna á morgun en ég er orðin ansi hreint svartsýn á það. Tæpast miðvikudaginn heldur, ég ætla EKKI að fara of snemma út núna og næla mér í lungnabólgu takk.

Mamma og pabbi komu færandi hendi með rafmagnshitapokann sem er þjóðnýttur í fjölskyldunni við svona skemmtileg tækifæri. Farin í bólið með hann.

flutningar

var að senda STEF skýrsluna mína – alveg slatti sem ég veit af í ár og reyndar þykist ég vita að hellingur sé í gangi sem ég veit ekki af. Sem betur fer.

Síðan í sept í fyrra:

5.10.09 Bakkabræður Hásalir, við Hafnarfjarðarkirkju 4′40” Frumflutningur
01.03.09 Tunga mín Langholtskirkja
Vorlauf
Grátur 1′35” Frumflutningur
Ástin græðir
(Kammerkór Norðurlands hélt fleiri tónleika með þessum verkum, ég er ekki með staði og nákvæmar dagsetningar)
08.03.09 Blandaðir dansar Hveragerðiskirkja
09.03.09 Blandaðir dansar Langholtskirkja
08.03.09 Píanótríó #1 Þjóðmenningarhús
28.04.09 Stökur Hásalir 2′13” Frumflutningur
03.05.09 Carmen fratrum Langholtskirkja
Stökur
Stiklur
(þessir tónleikar í Langholtskirkju voru tvíteknir, klukkan 17:00 og 20:00. Einnig fluttu fleiri kvennakórar Stökur í vor)
05.05.09 Carmen fratrum Langholtskirkja
25.05.09 Sé ástin einlæg og hlý Guðríðarkirkja
Ástin græðir eftir vos
Vorlauf
(Kammerkór Akraness hélt þessa tónleika einnig áður – ekki með nákvæmar upplýsingar)
28.05.09 Carmen fratrum Langholtskirkja
30.05.09 Slæðingur Íslenska óperan (píanóútdráttur af verkinu, ekki hljómsveit)
05.07.09 Maríuljóð Langholtskirkja
01.08.09 5 fuglar Skálholtskirkja 9′50” Frumflutningur á Íslandi (óskráð hjá STEFi?)
22.08.09 Í nálægð þinni Hallgrímskirkja

Smá slatti.

ef

ekki væri búið að fresta aðalfundi og partíi Hljómeykis einu sinni nú þegar, þá myndi ég fresta kvöldinu. En ætli maður drattist ekki gegnum fund og haldi út smástund í partíi.

Verst þetta er víst heima hjá mér…

gaah

röddin lítið skárri en í gær – ég er ekki með neina hálsbólgu lengur að ég finni fyrir, bara hás. Baaad!