Sarpur fyrir júlí, 2006

ég held

að ég sé mögulega að vinna bug á sjónvarpsfælninni. Horfði á Criminal Minds nærri allt áðan, stóð bara einu sinni upp. Og það var til að senda litla gaur í háttinn.

þegar

börnin eru þögnuð og slökkt hefur verið á sjónvarpinu heyrum við greinilega sigurrósarlega tóna. Um einn og hálfan kílómetra frá fjærenda Klambratúns, þar sem ég get ímyndað mér að tónleikarnir séu.

Ég vildi ekki búa í Norðurmýri eða Hlíðunum og leiðast Sigurrós.

Hálflangaði reyndar á tónleikana. Ég held að þeir hafi ekki getað fengið betra veður, stillt, þurrt og ennþá yfir 14 stiga hiti, þó klukkan sé að verða kortér yfir 11. Frábært, bara.

döög

skelkuð

vorum við hér heima í dag þegar litli gutti hvarf.

Hann er nýfarinn að fá að fara sjálfur út í Dreka að kaupa sér nammipoka stöku sinnum, í dag engin undantekning. Við á fullu að taka til og þrífa. Örugglega kominn hálftími þegar ég tek allt í einu eftir því að gaurinn er ekkert kominn til baka. Ég út í sjoppu, jújú, þangað hafði komið lítill ljóshærður gutti með gleraugu og keypt sér nammi fyrir 150 kall. Passar. Svona 20 mínútur síðan.

úff!

Leitað á öllum mögulegum og ómögulegum stöðum, náttúrlega rólóinn hér bak við og leikskólalóðin á móti. Enginn Finnur. Skiptum liði, Jón fór í dótabúðirnar á Laugaveginum og Vínberið, ég í Krambúð og þaðan upp á Hallgrímstorg, á Grænuborgarlóð, í styttugarðinn við Hnitbjörg. Algerlega Finnlaust svæði.

Enginn heima hjá besta vininum á móti. Heilmikið vesen við að finna út símanúmer pabbans, hann svo ekki með símann opinn. Grafin upp leikskóladeildarsímaskráin frá síðasta hausti, ég fer í að hringja í alla. Ekkert kom út úr því.

Þarna er liðinn um klukkutími frá því hann hvarf.

Hringt í lögregluna. Þeir lofa að senda bíl til að svipast um eftir sex ára gutta í svörtum buxum og grárri peysu, ljóshærðum með gleraugu.

Síðasta sem mér datt í hug var að það býr lítil stelpa hér í þarnæsta húsi. Ekki trúlegt að Finnur hefði farið inn til hennar, ég veit aldrei til að þau hafi leikið sér neitt saman. Ákveð að fara samt og banka upp á. Þegar ég kem að dyrunum heyri ég kunnuglega rödd innan frá. Jú jú, þar var minn litli maður á leiðinni niður tröppurnar. Hafði ekki verið hjá stelpunni heldur hafði hitt nýja strákinn á leikskólanum (kom um miðjan vetur og var þ.a.l. ekki í símaskránni), sá var í heimsókn hjá frænku sinni sem býr í þessu húsi. Höfðum ekki hugmynd um þessa tengingu. Fólkið hafði ekkert athugað að láta okkur vita. Get ekki álasað þeim, þetta kom einu sinni fyrir okkur líka. Jón Lárus segir frá líka á sinni síðu.

Ekki skemmtileg lífsreynsla.

Matarboðið tókst annars vel, þó við hefðum þurft að lækka viðmiðunarstigið á hreinleikastuðlinum örlítið.

fann annars

snilldar útvarpsstöð á netinu; hún er hér. Heitir Helios og er the most esoteric radio station on the whole Internet samkvæmt Kevin netkunningja mínum og samtónlistarnörd. Viss um að sumir lesendur mínir hér hefðu gaman af henni. Auglýsist sem sagt hér með.

íbúðin

er algerlega í rúst. Drasl og skítur og viðbjóður

Þannig að ég gerði það eina í stöðunni. Bauð fólki í mat í kvöld. Maturinn kominn í ofninn og tiltekt á fullt. Meira en hálf fjölskyldan ekki í bænum/á landinu þannig að við buðum þeim fjórum sem eftir eru. Langsteikt svínarif, sem sagt sullumatur í boði. Í uppskriftinni segir meira að segja að það sé erfitt að borða þetta með puttunum, hvað þá hníf og gaffli. Svo er að vita hvort þetta slær út rifjunum á Hereford, þau eru ágæt.

Arrg. Gersamlega að klikka á þessu! Býður maður ekki upp á bjór með svona mat? Kannski Jón nenni að hlaupa út í Austurríki og kaupa bjór.

íslensk

slagorð

hafa tendens til að vera í 6/8 takti.

annars var mótmælastaðan í dag ágæt, hefði mátt vera svona tíuþúsund manns í viðbót við þessa, hvað, fjögur – fimmhundruð sem voru (ágiskun svona sirka beint út í bláinn en gæti verið nokkuð rétt) Og bara stemning á staðnum. Ekki sást nú mikið líf í sendiráðinu, fremur venju.

litli gaurinn

er í útlegð hjá ömmu sinni og afa, fór á þriðjudaginn og kemur aftur í dag. Búið að vera frekar tómlegt. skrítið að leggja bara 4 diska á borð í stað 5. Unglingurinn sést lítið heima hjá sér líka, síðasti dagurinn hennar í unglingavinnunni í dag og svo var ein besta vinkona hennar að koma heim úr hálfs árs dvöl í Mozambique, þannig að ef Fífa er ekki í vinnunni er hún hjá Steinunni að skoða myndir, heyra frásagnir og festa hengirúm í tré.

Miðbarnið er hálf munaðarlaust, systkinin sjást ekki og allar vinkonurnar einhvers staðar í burtu. Bjargast með fyndnabarninu litlufrænku í dag og svo kemur jú bróðirinn heim síðdegis.

Ágætt að hafa vinnufriðinn, reyndar…

allir að mæta

hingað á eftir. Algjör skylda!

hægagangurinn

virðist að baki, ætli sæstrengurinn hafi verið niðri?

Kom nótum og diski af mér í gær, mikið ógurlega yrði nú gaman ef Guðbrandsmessan mín yrði flutt í Litháen. Ekkert í hendi en maður má nú láta sig dreyma. Lengi langað til að koma því verki betur á kortið. Watch this space.

Mínúta eða svo vannst í dag í píanótríóinu. Enda eins gott, það þarf helst að vera tilbúið í byrjun september. Gengur hægt með sinfóníuna, hins vegar. Mjakast þó.

vipta

Jón Lárus hamast við að setja upp viftu yfir eldavélinni. Þriðji áfangi nýs eldhúss. Snilld, bara. Þá getum við loxins farið að djúpsteikja af einhverju viti…

að Amazon.com væri farið að höndla með matvöru og hugsaði mér gott til glóðarinnar að panta ruslfæði frá Brandararíkjunum. (Kraft Luxury Mac&cheese, Jell-o með vatnsmelónubragði, Cheetos og svo lax í dós (ókei, kannski ekki junkfood)). Fyrsta hindrun: Voru ekki með Cheetos. Ókei, þoli það. Svo kom stóra hindrunin. Matvæli ekki seld utan Bandaríkjanna. Oooo.

Skil reyndar ekki hvers vegna lax í dós fæst ekki hér. Góður ofan á brauð. Hvernig væri að Ora tæki þetta til athugunar.

kötturinn

er gersamlega athyglissjúkur síðan við komum heim. Nágranni okkar hér í húsinu á bak við sá um að gefa henni mat og klapp einu sinni á dag en hún er svo mikil félagsvera að hún hefur pottþétt verið einmana.

Annars erum við að missa þessa frábæru nágranna, þau voru að kaupa sér hús í Njarðvík. Muuuu.

ský

skemmtilegt að sjá þokuna læðast svona út fjörðinn, sjá bæði undir og yfir og allt um kring.
þoka
Originally uploaded by hildigunnur.

Húslestur

Jón Lárus þýddi Ástrík úr ítölsku fyrir mig og krakkana. Náði að lesa allan Ástrík í Heilvitalandi og hluta af Bretalandi líka.
Húslestur
Originally uploaded by hildigunnur.

Tækjafríkin

í sveitaferð. Heil 6 hleðslutæki með í för og sum dugðu meira að segja fyrir fleiri en eitt tæki. Símahleðslutækið ómissandi þjónaði þremur símum, 3 myndavélar, sama tæki, 2 poddar, sitt hvort tækið, tölvan hennar Fífu, 1 tæki og svo GPS tæki Jóns Lárusar, eitt tæki. Svo var GameBoyinn hans Finns með en hann tekur bara venjuleg batterí þannig að honum fylgdi ekki hleðslutæki.

Bilun?


Tækjafríkin
Originally uploaded by hildigunnur.

fjaran

ótrúlega flott mynstur sem myndast þarna í sandinum. Smá skeljasandur blandaður við venjulegan svartan, líklega heldur léttari þannig að hann flýtur ofan á og færist með straumnum.
mynstur í sandi
Originally uploaded by hildigunnur.

Finnur og kuðungurinn

þessi var sprelllifandi og fékk að fjúka aftur út í sjó
Finnur og kuðungurinn
Originally uploaded by hildigunnur.

séð yfir Dýrafjörðinn

held að varla megi mótmæla því að þetta sé fallegt…
séð yfir Dýrafjörðinn
Originally uploaded by hildigunnur.

Súkkulaðikakan

á Hótel Núpi sveik ekki. Heimalagaður ís með, ekki síðri. Mmmm!
Súkkulaðikakan
Originally uploaded by hildigunnur.

bland í poka

teljari

  • 371.717 heimsóknir

dagatal

júlí 2006
S M F V F F S
 1
2345678
9101112131415
16171819202122
23242526272829
3031  

sagan endalausa