Sarpur fyrir ágúst, 2009

já og stráksi

er kominn í Drengjakórinn, flaug inn auðvitað (ekki að ég hafi búist við öðru…)

Fyrsta æfing á miðvikudaginn, spennandi að vita hvernig honum líkar.

góð tilfinning

að vera byrjuð í ræktinni aftur, orðið svolítið langt síðan síðast. Náði að klára tímann, mesta furða, væntanlega redda hjólreiðarnar þolinu.

Svo var Söngvaseiðsæfing, ég fylgdist með og skrifaði niður stöður og þannig, nú í kvöld er bara að læra þetta sem við eigum að syngja. Smá latínutexti kannski erfiðastur.

Kenna á morgun, úff!

ber, sveppir og svelti

er ekki eitthvað furðulegt við að fara í berjamó og sveppamó og svo nánast beint á fund til að hvetja mann til að borða lítið og hreyfa sig helling?

Það var allavega dagurinn hér.

Svo á morgun byrjar púlið – og svo æfingar í leikhúsinu. Jámm, ég er að fara að taka nokkrar sýningar fyrir Væluna í Söngvaseið. Klikkað spennandi, hlakka ekki smá mikið til.

fer ég til berja

fagran sunnudag…

góður

hann Gen, náði takttegundinni úr dæminu á undan.

Svona lítur byrjunin á þessu út:

soundcloud

nýr spilari – veit ekki hvort hann er neitt betri en sá gamli:

Held ég sé svolítið út úr kú þarna, öll dæmin á forsíðunni eru eitthvað house eða trans dót. En hei!

Hver heyrir takttegundina í þessu, annars?

hvernig

getur maður orðið svona óhemju þreyttur án þess að gera nokkurn skapaðan hlut?

Vöknuðum frekar seint, afslöppun fram yfir hádegi, skutumst í Ríkið og að kaupa bensín, síðan stímdum við í Mosfellsdalinn að kíkja á markaðinn – aldrei man maður eftir að koma með reiðufé, ég reyndar skil ekki alveg hvers vegna enginn þarna leigir posa, það kostar ekki nema 5000 kall per skipti (ef ég man rétt). Vorum að leita að næpum, þær voru svo reyndar ekki til, þannig að peningaleysið kom ekki að sök.

Svo var fjölskyldudagur Samskipa, hljómar reyndar ekki eins og að gera ekkert, en ég gerði samt nánast ekki neitt, Jón Lárus, Finnur og Freyja fóru í Lazer Tag (veit ekki hvers vegna það heitir ekki laser heldur lazer) en við Fífa gerðum ekkert nema vakta grillið og fá okkur borgara þegar þeir voru til.

Fífa keyrði bæði uppeftir og heim. Nú bara afslöppun og já, snemma í bólið held ég bara. Gersamlega að leka niður.

við borgum ekki!

eða hvað?

Þeir sem tala fyrir því að við eigum alls ekki að borga þessa árans IceSavepeninga þurfa að svara nokkrum spurningum.

Það er nokkuð vitað og víst að Bretar og Hollendingar munu ekki sætta sig við það. Hvað vill fólk þá gera?

Einangra landið og stunda sjálfsþurftarbúskap?

Ef svo, hvað lengi? Þar til útlendingar hætta að vera reiðir við okkur? Hvenær verður það? Einhvern tímann?

Hvað verður ÞÁ mikill fólksflótti? Við eigum ekki einu sinni kartöflur í ár, uppskeran brást. Hvað verður margt ungt fólk hér eftir ef við segjum við það: Nei því miður, engin epli eða appelsínur framar, hvað þá eitthvað exótískara. Engir nýir símar, netið mun hrynja því við munum ekki geta fengið varahluti, sama með samgöngur. Hellingur í viðbót. Hvað verða margir eftir? Allavega ekki ég.

Svo er hitt svarið: Semja betur.

Fyrir utan það að við hlið Svavars Gestssonar (hvort sem fólk hefur mikla eða litla trú á honum) VORU færir lögfræðingar og þrælvanir samningamenn, þá held ég að það sé nánast alveg sama hvað við finnum og getum borgað fært fólk, Bretar og Hollendingar hafa alltaf efni á stærri hópi og dýrari fræðingum. Burtséð frá því að það var jú búið að leggja drög að talsvert verri samningi í tíð stjórnar flokka þeirra sem hæst hrópa núna um vonlausan samning.

Nei, ég held að við ættum að sætta okkur við þennan (ef hann verður þá á annað borð samþykktur úti með fyrirvörunum), sjáum til hvað mikið fæst upp í skuldir, vonandi sem mest. Ef ekki, já þá kemur fólksflóttinn þá en ekki núna. Er það verra?

Svo fólk haldi nú ekki að ég sé ógurlega glöð með þetta þá er langt frá því. Held bara að þetta sé illskásti kosturinn í stöðunni.

hvað segir

þetta manni?

upprifjun

var að leita mér að textum og rakst þá á þennan:

Margur ágirnist meira en þarf
maðurinn fór að elta skarf
og hafði fengið fjóra,
elti þann fimmta og í því hvarf
ofan fyrir bjargið stóra.

Kunnugleg örlög?

vinnan

tekin við af fullum krafti. Dustað rykið af Finale síðan snemmsumars, ekki nema smá ýkjur. Pínu gott að hafa húsið út af fyrir sig (og köttinn reyndar).

leikhús, leikhús

hvern langar í leikhús í vetur?

Áskriftartilboð í Borgarleikhúsið: 4 sýningar að eigin vali á 6.900 kr. (2.000 kr. afsláttur). 3.450 kr. fyrir nema. Hafið samband…

bónusar, já

þetta Ted talk ætti að vera skyldugláp í öllum stjórnum stórfyrirtækja, öllum viðskiptaháskólum og víðar. Jáen, jáen, ef fólki er ekki borgað almennilega…

Alfie Kahn hefur skrifað tvær bækur um sama efni, Punished by Rewards og No Contest. Ekkert hlustað á hann. Hlusta núna, takk!

fjúkk!

Finnur var með frábæran kennara í fyrra og hitteðfyrra í skólanum. Einn besta kennara sem mín börn hafa haft. Hún er ekki útskrifuð úr kennaranáminu þannig að skólastjóra var settur stóll fyrir dyrnar með að ráða hana áfram, núna eru eingöngu kennarar með full réttindi að kenna í grunnskólum Reykjavíkur (amk. þar sem slíkir fást til starfa). Hroðalega súrt.

Ég var dauðhrædd um að hann fengi ákveðinn kennara sem Freyja hafði einu sinni – en hann er sloppinn. Vonandi er nýi kennarinn hans góður, þó ég geti ekki ímyndað mér að hún eigi séns í Drífu, hennar verður sárt saknað.

Bannsett skriffinnska!

ótrúlegur gutti!

þessi hér:

(æh, embedding bannað, þurfið að ýta aftur á myndina. Vel þess virði, samt)

gærdagurinn

var gersamlega frábær, eins og svo sem kom fram hér í gær. Toppurinn litlasystir og kompaní í troðfullri Dómkirkju (fullt af fólki þurfti að standa). Auðvitað hellingur og glás af atburðum sem maður missti af, en ósköp lítið hægt að gera í því.


(mynd fundin hjá Matta)

Ég skil ómögulega liðið sem þarf alltaf endilega að röfla yfir deginum og vera voða stolt af því að halda sig sem lengst í burtu. En það er svo sannarlega þeirra tap. Ég er þess fullviss að jafnvel hörðustu sjálfskipaðir menningarhatarar hefðu fundið eitthvað við sitt hæfi í gær. Það er líka orðið svo mikið af atburðum að það er ekkert eins og fyrstu árin, þar sem maður gekk á milli staða en komst hvergi inn fyrir troðningi.

Nóttin – það er svo aftur allt annað mál. Unglingurinn vildi endilega fara út – mér var eiginlega ekki alveg sama, en svo var þetta nú allt í fína, var bara með vinkonu sinni að þvælast.

Í dag hins vegar mestanpartinn afslöppun, ein sorpuferð og svo fórum við Freyja í Kringluna til að fá 3G kort fyrir nýju símana okkar. Bóndinn var hins vegar í sjálfspíningarham og hjólaði kring um Reykjavík í rokinu…

menningin

Keyptur nýr sími, check
nýir sálmar, check
Gradualekórinn, check
Áskirkjukórinn, check
Retro Stefson, check
Selurinn, check
Orb sýning, check
Hamborgari og bjór í bænum, neibb
Michael Jackson dansar, check
Húsaskrá Reykjavíkur, check
Fljótandi heliuminnsetning, check
Söngtónleikar í Dómkirkjunni, check
Flugeldasýning, check (sáum af varinhellunni heima – nenntum ekki út aftur)

Akkúrat núna, rauðvínsglas í rólegheitunum heima.

Góður dagur

upprunalegur litur

Ég er alltaf að bíða eftir því að húsið okkar komi í svona grein um vel uppgerð gömul hús í borginni. 97 ára er það í ár, eitthvað verðum við að gera til að halda upp á afmælið eftir 3 ár.

Hins vegar hugsa ég að arkitektinn sem var talað við í Fréttó í dag yrði ekki sáttur við litinn – hann er nefnilega ekki sá sem húsið var upprunalega í.

Hvað er eiginlega með það að hús eigi endilega að vera akkúrat í litnum sem þau voru máluð þegar þau voru reist (eða þeas. þegar þau voru máluð í fyrsta skipti, þegar járnið var orðið veðrað, í tilfelli járnklæddra timburhúsa)? Má ekki hafa tilbreytingu á hlutunum?

Við höfum reyndar ekki hugmynd um hvernig húsið var á litinn upprunalega – ég efast samt um að það hafi verið eins og í dag.

óttalega

er hann nú kreppulegur vínrekkinn núna:

fúlt

að þurfa að fara að klæðast sokkum aftur. Búin að sjá marga ákalla eina hitabylgju til á andritinu/smettinu/fb – verst að trúa ekkert á síkrit, þá myndi maður vera kominn á fullt að síkrita meira sumar.


bland í poka

teljari

  • 372.395 heimsóknir

dagatal

ágúst 2009
S M F V F F S
 1
2345678
9101112131415
16171819202122
23242526272829
3031  

sagan endalausa