Sarpur fyrir júní, 2008

ferðasagan

eins og ég sagði áður, verður ferðasagan á ensku að þessu sinni, hér er fyrsti partur, ég mun vísa í bútana héðan.

Þetta er aðeins erfiðara, sérstaklega vegna þess að ég þoli engan veginn að skrifa asnalega eða vonda ensku. Má gjarnan leiðrétta ef eitthvað af þessu kemur illa út…

góðverk dagsins

var að koma frá því að syngja við jarðarför í Digraneskirkju, þvílík ósköp af fólki, þurfti að leggja nærri úti við Smáralind (bara örlitlar ýkjur). Við Bragi Þór vorum samferða út á Digranesveg og gengum þar framhjá breskum túrista sem var að reyna að rata inn í Listasafn Reykjavíkur, hafði verið í Smáralindinni, haldandi að hún væri Kringlan.

Ekki hefði ég fyrir mitt litla líf getað bjargað honum með strætósamgöngur, hef ekki hugmynd um hvernig strætó gengur þarna og hvenær, en gat hins vegar boðið honum far niður í bæ og gerði það. Leit meinleysislega út, þannig að ég var ekki sérlega hrædd um að hann væri brjálaður axarmorðingi. Enda reyndist svo ekki vera.

Einn voða feginn túristi komst niður í bæ – og hugsar vonandi hlýtt til Íslendinga.

haldið þið ekki

að Finni hafi áskotnast nýtt hjól, næsta stærð fyrir ofan, með gírum og allt? Mjög vel farið, þarf að herða bremsurnar að framan og kaupa bjöllu og nýjan lás, annars í fínasta standi.

Takk Elías.

Nú verður því gamla hent. Ójá.

gott að vera

komin heim og sofa í eigin rúmi, ójá. Verst hvað það er stutt, Skálholt strax í næstu viku og svo Kaupmannahöfn í vikunni eftir það. Liggur við að mig langi bara til að vera heima hjá mér, en það er víst ekki alveg um það að ræða.

Ekki það, þetta verður bókað skemmtilegt. Ég á eftir að reyna að nýta mér kórastefnuna þarna úti í Köben, verð ekki að vinna fyrir Tónverkamiðstöð alveg allan tímann. Meiningin líka að hitta þá sem við náðum ekki að hitta núna um helgina.

En þessa vikuna er ég heima, sem er snilld. Sundnámskeið með Finni alla morgna, stefnum á að hjóla í Vesturbæjarlaugina (hmm, þarf að laga hjólið hans Finns, það er eiginlega ekki í ástandi)

letihaugar og hálfvitar

það erum við akkúrat núna. Búin að borða morgunmat, upp aftur á herbergi í sturtu og pakka, klukkan rúmlega tíu, ekki tékkað út fyrr en fyrir 12, alveg tími til að skjótast aðeins í bæinn. Komin út á gangstétt smá rigning, föttuðum að við höfðum gleymt regnhlífinni inni, en að við nenntum að skjótast aftur upp á herbergi til að sækja hana, ónei.

Svo á Strikinu kom auðvitað þrumuveður og hellidemba.

Nú komin aftur upp á herbergi, hundblaut. Aular!

duglegir stúdentar

sumir þeirra eru enn að fagna, núna klukkan hálfníu morguninn eftir útskrift.

Annars sváfum við nú bara vel, þrátt fyrir opinn glugga og allt.

Kíkjum til Svíþjóðar í heimsókn í dag.

Verður gott að koma heim í kvöld.

læti

Ekki er ég alveg viss um að við náum að sofna snemma í kvöld, hér fyrir utan eru þvílík læti, bílflautur og hróp og köll, enda við alveg niðri í miðbæ Kaupmannahafnar – og stúdentaútskriftir hér hafa greinilega verið í dag. Allir nýstúdentar Stórkaupmannahafnarsvæðisins og þó víðar væri leitað virðast vera að keyra hér framhjá í skreyttum vögnum, þeytandi bílflautur og aðrar flautur, blístrandi og fagnandi. Ekki er ég að kvarta, þetta er ógnar fjör, veit nú samt ekki hvort við förum að fara aftur út núna, ég er allavega frekar þreytt. Verst (tja, best, kannski upp á nætursvefn) að snúa ekki að Tívolí og sjá flugeldasýninguna.

aaaahhh

neeeetið!

Komin frá Tékkó alla leið til Kaupmannahafnar og þetta næs hótel sem ég er á er með frítt wifi á herbergjunum. Luvly. Nær 300 póstar á rss veitunni, næ reyndar ekki í póstinn, hann er heima, en hei, þetta er fínt.

Ekkert kíkt á net síðan við fórum, flugvellirnir láta mann borga helvítin á þeim, ekki að ræða að ég láti það eftir þeim.

Verst að komast ekki á ircrásina, skil það reyndar ekki þar sem ég virðist vera tengd við irc.hi.is, blessuð rásin bara opnast ekki.

Gæti verið að ferðasagan verði á ensku í þetta skiptið, svona fyrir Tékkana mína elskulegu, sem hafa borið okkur á höndum sér, frábært hvernig hefur verið tekið á móti okkur. Meira seinna, farin að lesa bloggrúntinn…

góð grein

hjá honum Matta. Hvað eru öfgar? Hvað eru talibanar?

heyrðu, já

og hjólið hans Finns fannst! Eða ég held það allavega. Alveg eins hjól var í geymslu lögreglunnar, reyndar örlítið verr farið en það gæti nú hafa verið þjösnast á því. Þarf að smyrja keðjuna og tannhjólið, og það er sprungið á því bæði að aftan og framan.

Sé þetta vitlaust hjól – tja, ég efast um annað en það sé afskrifað.

leiðangur

Um daginn skutumst við bóndinn í leiðangur, einhver ósköp áttu að gerast í sömu ferðinni, (fórum á bílnum, sko). Garðabær tekinn með trukki (smá tölvuaðstoð), sumarblóm í Mörk (steinhætt að fara í Blómaval og/eða Garðheima), Borgartúnsríkið og svo ljósaleiðangur, erum að leita að ljósum til að fella inn í gangstíginn sem á að leggja í garðinum helst í sumar.

Fundum ansi hreint flott og ekkert sérlega dýr LED ljós í Lumex, pínulítil, svona ljós. Meiningin er að setja slatta af þeim meðfram stígnum, felld inn í hellurnar.

Gæti orðið bara flott.

úff, hvað

vínin eru fáránlega dýr þarna á Reef N’Beef. 12 þúsund kall fyrir non-vintage Taittinger kampavín, 46 þúsund fyrir Run Rig frá Torbreck (kostaði um 13.000 kall út úr Ríkinu hér heima síðast þegar ég vissi) og annað eftir þessu. Ósköp venjuleg vín eins og Brown Brothers Everton (1.300 kall í ÁTVR) kostar 6.700.

Maturinn er ekkert svakalega dýr, til þess að gera, en mér sýnist við munum drekka bjór – eða vera með rauðvínið okkar í vasapela!

mikið get ég ekki

beðið eftir að komast til Tékklands, ekki á morgun heldur hinn! Þetta er besta spáin sem ég fann, er að hugsa um að nota hana.

Annars er prógrammið hjá okkur:

Laugardagur: Flogið til Kaupmannahafnar og þaðan til Prag, gefst ekki tími til að fara inn í Köben milli fluga. Sótt á völlinn í Prag og keyrt til Pilzen. Væntanlega fengið sér einhvern góðan bjór.

Sunnudagur: Frí. Eitthvað munum við væntanlega finna okkur að gera.

Mánudagur: Frí fram til klukkan 17:00, þá æfing á verkunum. Verkin eru: 5 fuglar, einn Davíðssálmur, nokkur þjóðlög.

Þriðjudagur: 11:00, samtalsþáttur í tékkneska ríkisútvarpinu (held ég). 13:00, fyrirlestur um tónlist mína í tónlistarháskólanum (glúbb). 20:00, æfing

Miðvikudagur: æfing og tónleikar.

Fimmtudagur: flogið til Kaupmannahafnar. Ekki hugmynd um hvað við ætlum að gera þar, nema væntanlega hitta einhverja vini og kunningja og heimsækja gamlar slóðir. Gist hér.

Föstudagur: sama, pantað borð á Reef N’Beef um kvöldið. Pínu spennandi.

Laugardagur: Væflast um borgina eða eitthvað. Flogið heim um kvöldið.

Og nei, húsið verður EKKI autt, þaddna, ef einhver er að lesa og leita að þannig…

hahah

var á blogggáttinni og síðasta færsla mín hljómar eins og einhver stjörnutrúarnöttarinn. Sólin og Venus í haus…

sólin og venus

þessi mynd er æði:

Venus ber við sólu, litla kúlan þarna til hægri…

tilraunaréttur

í kvöld var þessi hér, frá henni Pioneer Woman einhvers staðar í eðaluppsveitum Bandaríkjanna. Hvet fólk til að skoða síðuna hennar, hver uppskriftin annari meira spennandi. Hef prófað nokkrar og aldrei klikkað. Áströlsku kartöflulummurnar verða tildæmis bókað á fastalistanum hérna.

varúð

hvort vilduð þið heldur mæta þessum bangsa eða þá þessum hér (ekki fyrir viðkvæma)? Tja, eða bara þeim fyrri, sé hann svangur…

blessaður sautjándinn

gekk bara fínt fyrir sig, misstum reyndar að megninu til af skrúðgöngunni, fórum bara beint niður í bæ. Sáum flott atriði frá fimleikadeild Ármanns (held ég), Jón Lárus og stelpurnar fóru að skoða fornbíla og við Finnur stóðum í ógnarlangri röð til að hann kæmist í stærsta hoppukastalann á svæðinu.

Allt var fullt af lögregluþjónum niðri í bæ, ég veit ekki hvort þeir héldu að þeir væru á Akureyri, eða hvað.

Liðið mætti svo í pönnukökur með rjóma og sultu, ásamt sjónvarpsköku sem dæturnar bökuðu. Veit annars einhver hvernig stendur á þessu nafni á kökunni?

metsókn

Firefox stefndi á að ná metsókn á forriti í dag, glænýrri útgáfu af forritinu, þann 17. júní 2008.

Ekki veit ég hvort það náðist (eða jú, en enn svolítið langt frá markmiðinu, samt alveg nokkrar klst. eftir í ‘Meríkunni)

Allavega náði ég í mitt eintak (þitt líka, hér? eða þá á firefox.com, ef hinn virkar ekki) og sveimérþá, íslensku stafirnir virka, árans Finale nær ekki að klúðra þeim. Ég er búin að vera hundpirruð yfir að geta ekki notað Firefox, að mörgu leyti er hann mun betri en Safari.

Breytir reyndar ekki því hvað árans ruv.is er mikið IE miðað DRASL! segi frá því síðar.

víííí

Fífa flaug inn í MH, eins og við var búist. Samt snilld.


bland í poka

teljari

  • 371.611 heimsóknir

dagatal

júní 2008
S M F V F F S
1234567
891011121314
15161718192021
22232425262728
2930  

sagan endalausa