Archive for the 'vinnan' Category

pöntun en sumarfrí

jamm, datt inn pöntun í síðustu viku, frekar stór, lofaði að byrja að kíkja á hana strax í þessari viku.

Svo kom gott veður…

Allavega er ég lítið búin að gera í vikunni nema vera í sumarfríi. Reyndar alveg kominn tími á slíkt. Hrundi samt í mig byrjun á verkinu í baðinu áðan þannig að ég opnaði Finale og er komin með fyrstu taktana. Þurfti svo að lofa sjálfri mér að láta kjurt á meðan veðrið helst. Tími ekki að sitja inni svona úr því ég ræð þessu smá.

Hef alltaf skilað á tíma hingað til (bankbankbank) og ætla ekki að byrja að hafa áhyggjur af því í þetta sinn.

Á móti er ég með sólarexem og smá brunablett á annarri öxlinni. Þess virði.

étið

páskaeggsræfillinn minn, númer 4, náði að klárast í dag. Voðalega stolt af sjálfri mér hvað mér tókst að treina það lengi. Þar til ég mundi eftir því að ég er reyndar ekkert sérlega mikill nammigrís. Savoury, that’s me.

Úrbeinuðum kalkún í fyrsta skipti fyrir fjölskylduveislu á páskadag, fuglinn er bráðfyndinn svona flatur. Þarf að henda inn myndum.

Skrítið annars að byrja að kenna aftur, það er svo stutt eftir af skólunum mínum fram að sumarfríi að mér fannst varla taka því, gæti eiginlega ekki verið að það væri venjulegur kennsludagur. Ekkert eftir nema skrifleg tónheyrnarpróf í næstu viku (argh, á eftir að setja inn einkunnir! reminder to self í fyrramálið!).

Næsta vika verður hektísk, þrennir tónleikar í Hörpu og æfingar fyrir þá. Get ekki beðið.

Bill Gates syndrome

já eða bara kennaraveiki, ég er með hana. Verða ekki veik nema í fríum. Búið að vera snarbrjálað að gera, fyrir utan það sem ég lýsti hér í þarþarsíðasta bloggi (eða svo) bættust við inntökuviðtöl í tónlistardeild LHÍ, var þar í rosalegri törn allan gærdaginn, fyrir tónleikana. Tekur á, þó það sé spennandi að hitta allt þetta flotta fólk.

Gætum mögulega brotið ákveðið blað á næsta skólaári, meira um það síðar.

En allavega þá hrundi ég alveg í nótt, vaknaði titrandi og skjálfandi, veit ekki hvað ég var með mikinn hita, um miðja nótt. Heldur skárri í morgun en góð, nah. Súri pakkinn.

En tónleikarnir í gær voru annars æði, voða stolt af nemöndinni minni, flott útskriftarverk.

páháskafrí

alveg að detta inn – er reyndar með tónsmíðanema á morgun og hinn, stöðupróf nýnema í LHÍ á mánudaginn, kóræfingu mánudagskvöld, búin að lofa að spila í útskriftarverki á þriðjudaginn, æfingar fyrir það annað kvöld (svo beint á kóræfingu), sunnudag og mögulega mánudag, önnur kóræfing á mánudaginn, fyrir Hörpuvígslu, og svo er ég að reyna að koma saman stjórnarfundum. Er síðan bókað að gleyma einhverju.

Hver var að nefna páskafrí?

Er samt ekkert að kvarta, allt verður þetta gaman, hlakka sérstaklega til að hitta umsækjendur næsta árs í Listaháskólanum, alltaf spennandi að sjá nýjan hóp af flottu fólki.

og loksins

var komið að því að ég gerði eitthvað í þessari námsferð! Allir hinir kennararnir voru búnir að fara og sitja Suzukitíma sem mér fannst eiginlega ekki vera það sem ég þyrfti mest á að halda.

Reif mig á lappir snemma um morguninn og fór í heimsókn í New England Conservatory. Fékk að sitja tónheyrnartíma og skoðaði aðeins, skemmtilegt að sjá þennan fína skóla. Fékk slatta af nýjum hugmyndum en líka sönnun á því að ég er ekki að gera svo vitlausa hluti í minni kennslu. Gaman. Kíkti á Symphony Hall líka:

Meðan á þessu stóð voru hinir kennararnir að hitta Suzukigúrú mikinn, það var víst líka ansi magnað.

Seinnipartinn – já getið hvað nema meiri – verslunarferðir! Ég var samt eiginlega búin að kaupa allt sem ég ætlaði nema reyndar skó á stelpurnar og sumarjakka á sjálfa mig í staðinn fyrir bleika gallajakkann sem þeir sem þekkja mig hafa bókað séð mig í – en var orðinn ansi hreint slitinn. Fengum okkur síðbúinn hádegismat á írskum pöbb, reyndi aftur við Buffalóeitthvað og aftur voru vængirnir svo níðsterkir að ég þurfti að taka mér pásu frá því að borða af og til, til að leggja í næsta bita.

Prudential Mall upp á nýtt og bókabúðin aftur. Keypti ekki mikið í þetta skiptið, eina bók fyrir flugið heim (sem ég nýtti svo reyndar ekki), fann Art Supply búð (hmm, reyndar á sömu slóðum og ég hafði verið um morguninn, smáspöl frá verslunarmiðstöðinni) og keypti gjöf fyrir elsta ungling. Hitti Bryndísi aftur í bókabúðinni, klyfjaða ilmvötnum. Kolféllum svo fyrir sömu svuntunni á standi úti á gangi og keyptum okkur eins, þessi mynd á þeim:

Bjór og aðra ostaköku á Cheesecake Factory (já, ekki hlakkaði ég svo sem til að koma heim og stíga á v….na), sem betur fer höfðum við vit á að deila henni.

Crate&Barrel aftur, ég væflaðist fram og til baka og upp og niður og pældi í blessuðum eftirréttadiskunum en svei mér þá ef ég stóðst ekki freistinguna enn og aftur. Keypti bara eitt pínulítið mæliglas. Meðan við vorum inni í búðinni kom inn einhver klikkaður maður og hrifsaði stóran búrhníf af standi rétt við dyrnar. Öryggisverðir komu að honum og annað starfsfólk reyndi að láta á engu bera til að skapa ekki panikástand í búðinni, hringjandi í 911 í hálfum hljóðum, ég hugsa að fólkið uppi á lofti og innst í búðinni hafi ekki endilega orðið vart við þetta (ekki stór búð). Einhvern veginn tókst þeim að koma gaurnum út, hníflausum, áður en lögreglan kæmi. Búðarstjórinn var alveg í öngum sínum, sagði okkur að fara endilega til vinstri þegar við fórum út, því sá klikkaði hafði haldið til hægri. Ég sagði okkur helst ætla í leigubíl og hann stökk strax út á götu og veiddi bíla fyrir okkur (vorum 5 og komumst ekki í einn). Ljótu lætin. Ég var samt aldrei neitt hrædd, var ekkert í neinu návígi við hann, maður bara færði sig innar í búðina og sá að hlutirnir voru nokkurn veginn undir kontról. Ævintýri samt.

Hótel, afhlaða, síðasta búðarferð dagsins. Höfðum síðan mælt okkur mót hjá skrifstofustelpunum um kvöldið og fólk skyldi sýna afrakstur dagsins. Bryndís átti alveg eftir að kaupa gjafir handa einum.

Yfir til þeirra sem var farið að lengja eftir okkur (samtal fært í stílinn)

Anna: Hmm, ætli Bryndís og Hildigunnur fari ekki að koma?
Arnheiður: Veit ekki, best að senda SMS
*sent* Erud thid a leidinni?
*svar* Erum ad versla a Lyd, komum eftir sma.
Arnheiður les upp svarið
Anna: Ha? Hvað er þetta Lyd? Gata? Búð? Af hverju erum við að missa?
Arnheiður: Hmm veit ekki, kannski eru þær bara að kaupa sér vatn?

Til baka til okkar sem vorum búnar að versla á Lyd – og skó á stelpurnar mínar. Upp á hótel, rétt inn í herbergi og svo til þeirra, með smá bjór og flögur, já og Haagen-Dazs jarðarberjaís, namm! Tekið með kostum og kynjum og hvítvínsglasi. Byrjuðum að sýna afraksturinn, þar á meðal frakka og gríðarflotta fjólubláköflótta skyrtu á Lýð, kærasta Bryndísar. Sem Arnheiður þekkir frá fornu fari og var farin að hafa áhyggjur af að Bryndís ætlaði ekki að kaupa neitt fyrir…

Síðar um kvöldið komu allir kennararnir líka upp á þetta herbergi, kjaftað lengi fram eftir kvöldi og ég hef sjaldan hlegið jafn mikið á ævinni. Snilldardagur.

stend á haus

í Myrkum músíkdögum, hátíðin byrjaði í dag og þó ég sé nú ekki formlega í framkvæmdanefnd hennar þá er ýmislegt um að hugsa og svona sem stjórnarmaður í Tónskáldafélaginu mæti ég nú á alla þá tónleika sem ég mögulega næ.

Mæli annars með hátíðinni, sýnist hún verða gríðarlega fjölbreytt og skemmtileg, heimasíðan er hér, kíkið endilega!

eins og

ég er oftast nokk ánægð með vinnutímann minn þrátt fyrir að ég kenni tvo daga í viku ansi lengi fram eftir degi og svo kór- og hljómsveitaræfingar líka, þá hefur það stundum sína galla.

Til dæmis í dag þegar ég hefði svo gjarnan viljað koma upp í Þórshamar og fylgjast með Finni vinna sér inn fyrir næsta lit á belti í karate. En nei, kennsla.

Eftir rúma viku spilar svo Freyja sólósellópartinn í Jólakonserti Corellis og ég sé tæpast fram á að komast að hlusta á það heldur. Nema ef ég gef unglingunum mínum frjálsa mætingu í síðasta tímann fyrir jól, það hefur stundum virkað…

vikufrí

Listaháskólinn bara hefði ekki getað valið betri tíma til að senda fyrsta árið til Ísafjarðar í vinnuviku – við að syngja með Sinfóníunni (morgunæfingar) og svo er eldri unglingur að fara í hálskirtlatöku á morgun þannig að það er ógurlega gott að geta verið mikið heima. Tek mér líka frí úr kennslunni í Hafnarfirði á morgun til að geta verið hjá henni þannig að eina kennslan í vikunni var í gær. Ansi stutt kennsluvika það.

Svo er samt spurning hvort maður nái að nota tímann og semja. Má allavega reyna…

alltaf jafn

fáránlega góð tilfinning þegar miðvikudagskvöldið er runnið upp (geta annars kvöld runnið upp eða bara dagar?) og þessir þrír löööööngu dagar vikunnar búnir. Mánudagur frá níu til tíu, þriðjudagur hálftíu til tíu og miðvikudagur hálftíu, tja kennslan reyndar ekki nema til hálfátta en í kvöld var líka fundur, var búin klukkan hálftíu og náði í unglinginn á hljómsveitaræfingu klukkan rétt fyrir tíu.

(já já, ég veit, heimskulegt að monta sig af því hvað maður hafi nú mikið að gera, eins og þið öll hin séuð ekki álíka upptekin).

Mér finnst hins vegar vel þess virði að hrúga svona á þrjá daga til að geta haft síðustu tvo frí (bwahahah, frí!). Eða til að semja…

Spurning reyndar hvort maður á að henda inn umsókn um starfslaun á föstudaginn, ég hef ekki sótt um starfslaun í örugglega 7 ár eða svo. Ef einhver man eftir bloggfóníunni minni – já ég sótti semsagt um hana síðast og er alveg búin með svona 3 mínútur af þriðja kafla (Allegro furioso – Barnaland kemst í málið) þannig að ekki get ég sýnt fram á að vera búin með mikið þar. Hef samt svo sem verið að semja heilan helling þannig að það gerir væntanlega ekki sérlega mikið til.

ahhh

hvað er þægilegt að vera komin í þriðjudagsfrí – ég náði meira að segja að bæta við næstum því mínútu í framvindu í blessaðri sinfóníunni sem liggur annars eiginlega undir skemmdum, svo langt síðan ég kíkti á hana síðast.

Styttist í hinu líka, bæði Suz og Hafnarfjarðarkrakkarnir byrjuð í tónheyrnarprófum nema framhaldsstigið sem fer ekki í vorpróf, ég er alltaf með símat (nei, ekki símaat) í tónheyrnarkúrsunum.

Vantar eitt verkefni úr hljóðfærafræðikúrsinum til að geta gengið frá einkunnum þar.

Svo bara að rúlla upp öllum frágangi ekki síðar en í lok næstu viku. Puttar krossaðir.

margar útgáfur og margar kirkjur

langur dagur í dag, Söngvaseiðssýning, (fyrsta kirkja, í nunnuklaustrinu) mæting eitt, búið kortér fyrir fimm, brunað beint inn í Hallgrím (kirkja #2), tónleikar hjá Finni og hinum strákunum í Drengjakórnum, nánast troðfull kirkja, yndislegir tónleikar hjá þeim, heim sækja Freyju, selló og víólu, beint á æfingu í Grensás (#3) fyrir tónleika á morgun hjá Finni og Freyju, þaðan keyra stelpurnar næstum hálftíma of seint inn í Langholt (#4), Finn heim, aftur í Langholtið á aðventukvöld að hlusta á stelpurnar.

Í öllum kirkjunum nema nunnuklausturskirkjunni heyrði ég síðan mismunandi útgáfur af White Christmas – allt flutt af börnunum mínum ásamt kórum og hljómsveitum þeirra. Þrjár mismunandi í dag. Þarf eiginlega að finna Bing Crosby á jútjúb og hlusta. Og þó, væmið…

Hér kemur ein útgáfa dagsins. Reyndar síðan í Kringlunni í gær.

eeelska

löngu helgarnar mínar. Kennslan búin fram á mánudag.

jámm, eins og ég hef svo sem tekið fram áður þá er þetta ekkert frí, semja á morgun og hinn, ein för á hinn, tónleikafargan um helgina plús sýning á Söngvaseiði og afmælisveisla tengdapabba.

Fékk annars gríðarspennandi nýja pöntun í gærkvöldi, þrennt í gangi núna aftur. Væri samt alveg til í að fara að geta klárað skemmtilega lagið fyrir Kammerkór Norðurlands, kannski maður hjóli aftur í textaleit í fyrramálið.

sveimérþá

vetur úti.

Og MH-Kvennódagurinn í dag, krakkarnir í keppnum og leikjum í Hljómskálagarðinum ekki mest spennandi.

Bóndinn ætlaði að hlaupa 10 km í einhverju sponsorahlaupi í kvöld, ekki held ég það sé spennandi. Unglingurinn með nýja bílprófið var að væla um að fá bílinn, gæti verið að við látum það eftir henni, svona ef hún nennir að keyra og sækja mömmu sína fram og til baka í Alpana.

Hlakka annars til í kvöld…

heh

hefði það ekki verið fyrir að Finnur þarf að breyta víólutímanum sínum í næstu viku hefði ég bókað ekki farið inn á stundatöfluna mína í Listaháskólanum og aldeilis ekki uppgötvað að ég er í fríi þar á morgun. Bara mætt galvösk, ætlað að fara að kenna og ekkert skilið í því hvað væri með nemendurna…

Nú skal samið. Árans blessuð leikfimin þvælist þvílíkt fyrir tónsmíðunum, morgnarnir eru einmitt tíminn sem nýtist mér hvað best. Verð að fara að klára þetta tvennt sem ég á útistandandi.

vinnan

jámm, drattast í vinnu í dag, orkaði samt ekki leikfimina í morgun.

Nei nei, ég er ekkert að fara of snemma út. Samt vissara að þurrka hárið almennilega áður en ég strætóast inn í Hafnarfjörð.

nei

svínið er það ekki en ég er nú slatti slöpp samt. Er samt í fullri vinnu í dag við að hlusta á útvarpið og hugsa um kokka og þjóna í Restaurant City leiknum á andritinu.

Svo er ég með hrikalegar harðsperrur eftir leikfimina í gærmorgun (nei, það er ekki allur lasleikinn, svona ef LHÍ fólk er að lesa…)

fáránlega

skemmtilegt kvöld

en nánast óundirbúin vinna á morgun – fyrsta sýningin mín á föstudaginn kemur og ég ætlaði að sjá sýningu fyrir það áður en ég sýni. Sú er á morgun

Sofa!

impóneraði

nemendur í dag með 13/16 laginu mínu. Netið er næs. Ekki verra að komast á það úr skólunum.

Loksins komið net upp í stofuna mína í Suzuki, það er bara snilld. Var sett þráðlaust net í skólann í fyrra en beinirinn var svo mikill ræfill að hann náði engan veginn milli hæða. Nú komin framlengingargræja þannig að ég get tengst uppi í stofu. Hellingur af ÞúRörsklippum og fleiru sem er gaman að nota í kennslunni.

Og nú vantar mig auðvitað nýjan lappa. Verst að það er víst ekki alveg á stefnuskránni í bili.

undirbúningur

á mánudögum sýnist mér ég þurfa – fyrir utan að finna sjálfa mig til og gögn fyrir kennsluna – að pakka víólu og sellói, nótum og tónfræðidóti fyrir víólu- og sellóbarn og nesti fyrir bæði. Dragnast síðan með þetta út í bíl, sækja Finn og Freyju og keyra í Suzukiskólann. Eins gott að ég finni stæði ekki langt frá húsinu á sunnudagskvöldum…

(tja, reyndar er nú spurning um að láta þau vera búin að undirbúa sig sjálf, svo ég þurfi bara að rogast með dótið, ásamt mínum eigin tölvubakpoka, út í bíl. Nóg samt).

merkt

bak og fyrir nýja vinnustaðnum. Merkið er þrælflott.

Samt spurning hvort ég verði ekki að fara inn í leikhús eftir helgina og skrifa undir samning…


bland í poka

teljari

  • 371.717 heimsóknir

dagatal

september 2020
S M F V F F S
 12345
6789101112
13141516171819
20212223242526
27282930  

sagan endalausa