Archive for the 'græjur' Category

heyrnartólin

þau skærgrænu og retró – þættinum barst bréf með beiðni um mynd:

Fín, ik?

skil ekkert í

hvers vegna kötturinn er ekki búinn að vera með nefið stanslaust við magann á mér að furða sig á látunum – hef sjaldan eða aldrei vitað annað eins garnagaul og núna í þessari bannsettu magapest. Jámm ekki enn orðin alveg góð, fór að kenna í gær og gafst upp um miðjan dag, elsku Þóra mín samkennari og Hljómeykisfélagi sá aumur á mér og tók fyrir mig seinni tvo tímana. Ákvað svo í dag að vera gáfuð og halda mig heima og ná þessum fjára algerlega úr mér.

Er að dútla við að skanna gamlar blaðaúrklippur í staðinn. Verst að skanninn minn er ekki alveg nógu stór, nær ekki heilum blaðsíðum.

Önnur færsla eftir smá, um skemmtilega grein sem ég fann.

urr

mýslan mín er að gera mig vitlausa – hún er búin að eiga það til síðustu daga að tvíklikka en núna gerist það nánast alltaf. Var í dag að setja texta við verkið sem ég er að semja og allavega einu sinni tókst henni að fimmklikka (myndi það heita quintuple click upp á ensku?)

Það versta er að hún er innan við ársgömul. Jón Lárus er búinn að grafa upp kvittunina, hún kostaði „bara“ þrjúþúsundogfimmhundruð en á maður samt að fara og röfla? Er ekki tveggja ára ábyrgð á svona eins og öðru tæknidóti eða er það bara ef varan er yfir einhverri ákveðinni upphæð? (þá væntanlega hærri en þrjú og fimm). Veit einhver?

Akkúrat núna var ég að reyna að merkja við category fyrir færsluna, setti inn tvær (vesen og græjur) og í bæði skiptin þurfti ég að smella 5-6 sinnum til að hakið festist.

Eins og ég sagði fyrst, urrr. (já það má sosum verða reiðari yfir ýmsu öðru en það er samt hægt að vera pirraður yfir smáhlutum…)

að búa til

afmælisgjafir er góð skemmtun.

Er samt ekki alveg handviss um að mér takist að klára mína fyrir kvöldið. Og prenta út. Og já, humm prentarinn er leiðinlegur við mig og blettar pappírinn.

Það festist nefnilega blað í honum um daginn, ég náði því öllu út nema einu snifsi sem ég gat engan veginn fundið, skildi ómögulega í þessu. Var búin að taka prentarann eins mikið í sundur eins og ég þorði, alla lausu partana sem er auðvelt að fjarlægja og svo skrúfa lokið af. Óskiljanlegt.

Fékk uppgefið hverjir þjónusta Brother prentara, það reyndist vera verkstæði við hliðina á Suzukiskólanum í Sóltúni. Viðgerðarmaðurinn var byrjaður á því að útskýra ítarlega hvar þeir væru til húsa en ég rata reyndar á vinnustaðinn þannig að mér tókst að stoppa hann.

Svo var pappírssnifsið fast í blekhylkinu. Ég hafði ekki hugmynd um að það væri hægt að ná því í sundur, tók það bara úr. Viðgerðarinn var svona 15 sekúndur að kippa þessu í lag og tók ekki krónu fyrir. Mjög næs.

Síðan þarna hafa blöðin komið út með rönd og flekkjum, ég vona það sé bara prenthylkið ekki að ég hafi klúðrað prentaranum með að taka hann í sundur.

ekki versla við Hljómsýn og Litsýn

minns er fúll núna!

Forsagan: Fjölskyldan gaf mér heyrnartól í jólagjöf, ég á erfitt með að vinna heima nema þegar ég er ein, þar sem tónsmíðar þurfa talsverða einbeitingu og gengur illa ef einhver er með sjónvarpið í gangi niðri í herbergi fyrir neðan skrifstofuna mína (tröppur á milli, ekki hægt að loka). Þannig að mig var farið að langa í góð heyrnartól. Fórum fyrst í Pfaff til að athuga með Sennheiser, því miður voru ekki til þar tól sem mér fannst henta mér. Við í Hljómsýn og fundum þar þessi og leist vel á. Smelltum okkur á þau.

Nema hvað. Við erum búin að nota þau og passa gríðarvel upp á þau í rúmlega hálft ár, sándið fínt, ekkert upp á það að klaga. Einn daginn sit ég inni í stofu og Freyja hjá mér. Hún ætlar að fara að horfa á einhvern þátt í tölvunni, tekur heyrnartólin og ætlar að setja þau upp á höfuðið. Nema spöngin bara brotnar! Hún er þá úr einhverju ósköp venjulegu plasti, ekkert styrkt. Freyja var ekkert að þvinga þau út og hún er ekki höfuðstór, var bara að smeygja þeim ósköp venjulega upp á höfuðið. Hreint ekki verið að fara illa með þau á nokkurn hátt.

Ég nokkrum dögum seinna í Hljómsýn og lýsi atvikum. Fæ þar mjög almennilegan starfsmann sem segist ætla að athuga hvort ekki sé hægt að græja þetta fyrir mig. Heyri svo ekkert frá þeim í um 3 vikur. Fer núna eftir helgina og þá var komið annað hljóð í strokkinn. (annar afgreiðslumaður): Þið hljótið að hafa farið illa með þetta, svonalagað brotnar ekkert við eðlilega notkun. Við höfum ekkert með þetta að gera. Farðu bara upp í Litsýn, þeir sjá um viðgerðir fyrir okkur. Sagt með talsverðum þjósti.

Ókei, shit happens, við getum auðvitað ekki sannað að það hafi ekki verið farið illa með græjuna. Upp í Litsýn.

Þar er ósköp almennilegur afgreiðslumaður, tekur á móti heyrnartólunum, spyr mig hvað þau hafi kostað (30 þúsund – áttu reyndar að vera heldur dýrari), jújú þá geti nú verið að það fáist varahlutur. Ég heim. Strax daginn eftir fæ ég sms um að þetta sé tilbúið. Þangað aftur og jú jú, viðgerðin búin en getið hvað þetta kostaði.

Fimmtán þúsund fjögur hundruð og áttatíu krónur takk.

Ég ætla ekki að efast um að þetta hafi verið talsverð vinna, en að manninum skyldi ekki detta í hug að hringja í mig þegar hann áttaði sig á því hvað þetta gæti orðið dýrt og spyrja hvort ég vildi samt láta gera við – það get ég ómögulega skilið. Hefði ekki dottið það í hug – annaðhvort fengið að kaupa varahlutinn og altmuligmanden minn hefði fiktað þetta saman, eða þá bara taka fram duct tape og vírherðatré eða álíka.

Allavega mun ég væntanlega hvorki stíga fæti inn í búðina né viðgerðarþjónustuna aftur. Grrrr!

flakkari

var loksins að fjárfesta í slíkum, hörðu diskarnir á vélinni minni að verða fullur (allavega sá sem ég er með undir gögn, reyndar enn svolítið pláss á stýrikerfisdiskinum ennþá.

Ég er að spá í að kalla flakkarann Gvend dúllara.

En þegar maður er farinn að taka vídjó villt og galið er fljótt að fyllast. Held ég hafi tekið hátt í 20 megagígabæt bara í ferðinni úti núna. Sé fram á smá tíma í vinnslu á efninu, fyrir utan það sem er farið/mun fara á jútjúb, ætla að búa til disk með skemmtilegustu upptökunum og gefa kórnum til minningar um ferðina.

Svona þegar ég er búin með þetta þrennt sem ég á eftir að klára að semja… (og reyndar mögulega að bætast ein pöntun við núna).

kemst

ekki hjá því að fara að kaupa mér flakkara, vídjóvélin með nánast fullan 20 gíg disk, þó ég sé með alveg allt í lagi stóra diska í tölvunni þarf ekki mjög margar svona ferðir til að fylla.

Það fara semsagt fljótlega að koma myndir og vídjó.

búin að vera að

pirrast ógurlega yfir því að geta ekki hlaðið myndavélarrafhlöðuna þar sem ég er ekki með tengilinn frá bresku snúrunni úr hleðslutækinu yfir í venjulegar innstungur með mér. Þar til Jón Lárus fattaði áðan að það má skipta út snúrunni úr tækinu með snúrunni úr vídeóhleðslugræjunni. Þanebblaþa!

lyklaborðið mitt

gafst upp í morgun. Reyndar orðið frekar gamalt, ég fékk að mig minnir ekki nýtt lyklaborð með þessari vél, sem er nú orðin að verða tveggja og hálfs árs. Lengi búið að vanta á það vinstri hástafatakkann, spurning hvort ég geti vanið mig á að nota hann aftur, var alltaf farin að nota þann hægri, líka þegar ég hef verið á vélum þar sem allt í lagi er með báða takka. Svo var borðið líka stundum farið að pota inn auka bilum, þar til í morgun að biltakkinn virkaði bara alls ekki. Alveg í svona 5 mínútur. Var búin að bölva þessu og búin að klippa út bil til að líma (það er talsvert pirrandi) en eftir smástund bara gafst blessað borðið alveg upp.

Hjólaði út í apple og fjárfesti í nýju lyklaborði, flatt og voða fínt. Hitt er í uppþvottavélinni í augnablikinu (nei, ekkert uppþvottaefni, já ég hef bjargað borðum amk. tímabundið með þessu, bara passa að þorni vel). Nei er ekki enn farin að nota vinstri hástafatakkann.

Nú langar mig út – en ekki alveg strax, morgunninn fór fyrir lítið í samningu.

geislaspilarinn

og útvarpið í bílnum okkar hefur fengið undarlega sýki, stöku sinnum þegar við erum að hlusta á disk í mesta sakleysi, hoppar spilarinn yfir á útvarpið. Ekki nóg með það, heldur er það alltaf Bylgjan sem verður fyrir valinu.

Manni getur nú brugðið…

dvd

jæja, þá er maður kominn á næsta skref í vídjóvinnslu, búin (tja byrjuð) að læra á iDVD og búin að brenna tvo diska með upptökum. Ekki sem verst. Er enn að krukka í iMovie, kann ekki sérlega vel á það.

Þetta er skemmtilegt.

Tunga mín

sálmur, saminn fyrir Tónlistardaga Dómkirkjunnar fyrir nokkrum árum. Kammerkór Norðurlands flytur.

Ég var í óttalegum vandræðum með vélina þarna í byrjun tónleika (þetta var fyrsta lagið), skildi ekkert í því hvers vegna ég fékk enga mynd á skjáinn, kveikti og slökkti aftur og bölvaði því að græjan væri strax farin að bila.

Þar til ég mundi eftir lokinu fyrir linsunni…

Finnur

var voða flottur á tónleikunum á laugardaginn, Freyja reyndar líka en myndatakan klikkaði ansi illilega (kann ekki almennilega á vélina ennþá) þannig að sú upptaka ratar ekki á netið. Næst, bara. Eða hmm, það er reyndar ágætis upptaka af La Cinquantaine síðan um daginn, best að henda henni inn.

Gaman að þessu vídjódóti.

jei

búin að koma vídjóvélinni í samband við bæði tölvuna og ekki síður iMovie. Þurfti að kaupa converter, þar sem Panasonic getur náttúrlega ekki skilað á skiljanlegu formati heldur er með sitt eigið, og eigin vinnsluforrit sem fylgir á diski – en bara fyrir Windohze.

langar…

í þetta:

fjárfesti*

í vídjótökuvél um daginn, þegar vídjófídusinn á myndavélinni minni bilaði, efast um að það svari kostnaði að gera við hann og ég var hvort sem er hundpirruð á honum þar sem hann tekur bara 3 mínútur, ekki hægt að stilla á lengra myndskeið.

Komst að því þegar ég kom heim að það gæti verið bögg að samhæfa vélina makkanum, hvað er með að hafa ekki hugbúnað fyrir hvorttveggja með svona vélum? Fann væntanlega út úr því, hægt að hlaða niður plástri til að láta iMovie lesa merkin frá vélinni.

Ætlaði svo að reyna þetta í dag en þá þarf að tengja græjuna framhjá batteríi í gegn um hleðslutækið til að hlaða inn á tölvu og ekki nóg með það heldur þarf batteríið að vera í hleðslutækinu að ég best sjái. Og ég vil láta batteríið klárast áður en ég hleð það.

Skilur þetta annars einhver?

Sem sagt, þó ég viti að þið bíðið öll með öndina í hálsinum eftir myndum frá tónleikunum hennar Fífu í dag – það verður því miður að bíða smá ennþá…

*afsakið að ég skuli nota þetta ljóta orð.

biluð myndavél

mu, vídjófídusinn á myndavélinni minni er bilaður.

Mikið langar mig í vídjótökuvél.

nýja dótið

mitt virkar, skanninn kominn í gagnið, sjá hér mynd af frumburðinum.

Fifa

Geeekt gaman!

haha

gott að ég var ekki búin að spyrja í búðinni um þessa örstuttu snúru úr skannanum, hún er nefnilega úr lokinu niður í sjálfan skannann. Skildi ekkert í þessu, parallel tengi og alltsaman.

Nú ætti skanninn að fara að komast í gagnið sem sagt.

Og enn eykst við snúruflækjurnar, bæði uppi og niðri…

mjakast

ljósleiðarinn er aaaalveg að koma, sjónvarpið komið, þráðlausa netið líka en okkur vantar að tengja turninn við net og svo símann. Þurftum 12 metra netsnúru en auðvitað var bara til 10 og 20 metra. Nú þarf að fela 8 metra af snúru einhvers staðar…

Svo er bara sirka 20 cm snúra aftan í skannanum, þarf að fá framlengingu á því. Undarlegt.


bland í poka

teljari

  • 371.611 heimsóknir

dagatal

júlí 2020
S M F V F F S
 1234
567891011
12131415161718
19202122232425
262728293031  

sagan endalausa